Capello: Terry verður ekki fyrirliði á meðan ég er landsliðsþjálfari

„Terry verður ekki fyrirliði fram að HM né heldur á meðan mótið stendur yfir. Hvað með eftir HM? Ef ég verð áfram með liðið, þá gildir það sama.

Terry verður ekki fyrirliði á meðan ég er landsliðsþjálfari. Ég fór sérstaklega fram á að fyrirliði landsliðsins myndi sýna gott fordæmi fyrir ungt fólk og það sem hann gerði er óafsakanlegt.

Ég er búinn að segja honum það og hann skildi mína afstöðu," sagði landsliðsþjálfarinn Fabio Capello hjá Englandi í viðtali við Guardian þegar hann var spurður út í það hvort að John Terry myndi einhvern tímann fá fyrirliðabandið aftur.

Capello tók sem kunnugt er fyrirliðabandið af Terry eftir að upp komst um framhjáhald varnarmannsins með barnsmóður og fyrrum kærustu Wayne Bridge sem gefur í kjölfarið ekki lengur kost á sér í landsliðið.

Capello segir Terry þó áfram hafa mikilvægu hlutverki að gegna í landsliðinu.

„Ég hugsaði aldrei um að taka Terry alfarið út úr landsliðinu. Terry er áfram mikilvægur hlekkur í liðinu og leiðtogahæfileikar hans nýtast liðinu áfram þó svo að hann beri ekki fyrirliðabandið," sagð Capello.