Samfylkingin blessar ekki auglýsingu prests

Auglýsing séra Bjarna Karlssonar sem tekur þátt í prófkjöri Samfylkingarinnar vegna komandi borgarstjórnarkosninga í Fréttablaðinu í dag hefur valdið taugatitringi á meðal annarra frambjóðenda flokksins.

Í prófkjörsreglum er frambjóðendum óheimilt að auglýsa framboð sitt í fjölmiðlum. Þó er frambjóðendum heimilt að auglýsa fundi eða aðra viðburði eins og til dæmis opnun kosningaskrifstofu eða málefnafundar sem tengjast framboði þeirra. Kostnaður við þær auglýsingar má þó ekki fara yfir 300 þúsund krónur og þá má heildarkostnaður við framboðið ekki vera meira en hálf milljón.

Bjarni birtir meðalstjóra auglýsingu í Fréttablaðinu í dag þar sem 15 einstaklingar lýsa yfir stuðningi við hann, þar á meðal eru Ilmur Kristjánsdóttir leikkona, Svanur Kristjánsson prófessor í stjórnmálafræði, Óskar Guðmundsson rithöfundur og Ellen Kristjánsdóttir söngkona. Auglýsing Bjarna brýtur þannig þær reglur sem fulltrúaráð Samfylkingarinnar í Reykjavík og frambjóðendur í prófkjörinu samþykktu.

Í samtali við fréttastofu sagðist Páll Halldórsson, formaður kjörstjórnar, hafa heyrt af auglýsingunni en ekki hafa náð að kynna sér efni hennar. Kjörstjórn fylgist með að reglum prófkjörsins sé framfylgt og vekur athygli frambjóðenda á því ef hún telur að útaf þeim sé brugðið.

Prófkjör Samfylkingarinnar sem fer fram á netinu hófst á þriðjudaginn og lýkur á laugardaginn. 13 gefa kost á sér. Samfylkingin fékk fjóra borgarfulltrúa kjörna í kosningunum 2006.