Hermann ásakaður um hraðakstur - lýsir yfir sakleysi

Landsliðsfyrirliðinn Hermann Hreiðarsson hjá Portsmouth er ásakaður fyrir hraðakstur en frá þessu er greint í staðarblaðinu Portsmouth News í dag.

Hermann var mældur á 109 mílu hraða eða 174 km hraða á svæði þar sem 110 km er hámarshraðinn og gæti átt yfir höfði sér sviptingu á ökuleyfi sínu.

Atvikið átti sér stað 3. október eftir 0-1 sigur Portsmouth gegn Wolves á Molineux-leikvanginum en Hermann átti að koma fyrir rétt í Bournemouth í gær.

Hermann var aftur á móti fjarri góðu gamni en lögfræðingur hans lýsti yfir sakleysi í málinu fyrir hönd Hermanns.