Vinsamlegast haldið ykkur fast í flugtakinu

Flugmálayfirvöld í Rússlandi rannsaka nú hvernig á því stóð að sex farþegum var hleypt um borð í flugvél í Tyrklandi án þess að til væru sæti fyrir þá. Vélin var frá rússneska flugfélaginu Tatrastan Airlines.

Enginn matur var til fyrir þessa farþega. Það sem þó þykir alvarlega var að engar súrefnisgrímur voru til fyrir þá ef á þyrfti að halda, og heldur engin björgunarvesti.

Breska blaðið Daily Mail sagði frá þessum atburði. Í athugasemd við fréttina bloggaði einn lesandi: „Guð minn góður, ég vona að Ryanair frétti ekki af þessu."