Gestir skysports.com spá Manchester United titlinum

Manchester United mun vinna enska meistaratitilinn ef marka má gesti heimasíðu Skysports. 26 prósent spá því að United-liðið endurheimti enska titilinn en 50 þúsund atkvæði hafa borist í könnun síðunnar. Enska úrvalsdeildin fer af stað 14. ágúst.

Manchester United fær sjö prósentum fleiri atvæði en Chelsea og Liverpool sem koma í öðru sæti með 19 prósent atkvæða hvort. Arsenal er í 4. sætinu með 15 prósent og Manchester City er síðan í fimmta sæti með 10 prósent atkvæða.

Veðbankar eins og Sky Bet eru hinsvegar á því að mestar líkur séu á sigri Chelsea annað árið í röð en að þetta verði einvígi milli meistara síðustu ára, Chelsea og Manchester United. Manchester City er þar sett á undan Arsenal og Liverpool.