Zola: Við munum láta þá hafa fyrir hlutunum

Knattspyrnustjórinn Gianfranco Zola hjá West Ham er hvergi banginn fyrir heimsókn liðs síns á Old Trafford fyrir leikinn gegn Manchester United í kvöld.

West Ham hefur átt undir högg að sækja á yfirstandandi keppnistímabili og er í bullandi fallbaráttu en eftir tvo sigurleiki í röð hefur pressan á Ítalann brosmilda og leikmenn liðsins minnkað örlítið.

„Þessir tveir sigurleikir hafa gefið liðinu gríðarlega mikið því nú getum við spilað með meira sjálfstrausti og spilað til sigurs en ekki bara vera hræddir við að tapa ekki leikjunum okkar.

Við mætum því grimmir í leikinn gegn United og við munum láta þá hafa fyrir hlutunum. Þeir eru meistararnir og þetta verður því mjög erfitt en það býst enginn við neinu af okkur í leiknum og ef við myndum fá eitthvað út úr leiknum þá yrði það bara bónus.

Eftir tvo sigurleiki í röð er smá skriðþungi með okkur og við ætlum að gera allt til þess að halda honum áfram og vonandi skilar það einhverju," sagði Zola í viðtali á opinberri heimasíðu West Ham í dag.