Gagnaver rísi í Kapelluhrauni

 Hafnarfjarðarbær og Titan Global ehf. hafa undirritað yfirlýsingu um uppbyggingu á 40 þúsund fermetra gagnaveri í Kapelluhrauni.

Fyrirvari er í viljayfirlýsingunni um raforkuöflun.

„Aðilum er ljóst að til þess að af uppbyggingu gagnavers verði þarf Titan Global ehf. að ná samningum meðal annars um orkukaup, orkudreifingu og gagnaflutninga“, segir í yfirlýsingunni.

Áætlað er að bygging fyrir gagnaverið verði um fjörutíu þúsund fermetrar að flatarmáli. Í yfirlýsingunni kemur fram að á næstunni verði unnið nánar að skipulagi byggingarinnar í samráði við sveitarfélagið og skipulagsyfirvöld.

„Tekin hefur verið frá lóð í 1. áfanga Kapelluhrauns, sem afmarkast af vegi meðfram mörkum eignarlands Geymslusvæðisins að norðan, Koparhellu og lóð nr. 3 við Koparhellu að austan, og mörkum akstursíþróttasvæðis að sunnan og suðvestan“, segir um áætlaða staðsetningu gagnaversins. Eftir að endanleg lóð hafi verið ákveðin og Titan Global staðfest vilja til að byggja á þeirri lóð eigi Hafnarfjarðarbær að ljúka þar deiliskipulagi innan þriggja mánaða. - gar