Spyr hvort línuívilnun verði fyrir árabátaútgerð

Frumvarp Jóns Bjarnasonar sjávarútvegsráðherra, sem er í meðförum Alþingis, um nokkrar breytingar á kvótalögunum, veldur miklum titringi í sjávarútveginum, einkum þau áform að ríkið leigi út skötuselskvóta. Hann verður þó ekki leigður þeim sem veiða þennan fisk á upphaflegri veiðislóð við suðurströndina, frá Hvalnesi til Krýsuvíkurbjargs.

Á Hornafirði spyr aflakóngur smábátasjómanna, Arnar Þór Ragnarsson, um réttlætið. Þeir geti ekki fengið kvóta úr þessum potti heldur þurfi að leigja hann á markaði fyrir 300 krónur kílóið. Á sama tíma ætli ríkið að leigja öðrum hann á 120 krónur. Það sé ekkert réttlæti í því.

Annað umdeilt ákvæði gerir ráð fyrir aukinni línuívilnun en aðeins til þeirra sem eru með fólk í landi að handbeita línuna eða stokka hana. Bátur eins og Ragnar SF er hins vegar með línubeitingavél um borð og fær því ekki viðbótarkvótann.

Arnar kveðst ekki vera á móti útlendingum en þetta sé ekki vinna sem Íslendingar vilji vinna í dag. Það séu einkum Pólverjar sem vinni við að beita, - þótt hann hafi ekkert á móti því, en menn séu að tala um að skaffa vinnu fyrir fólkið í landinu. Þetta séu öfugmæli miðað við þróunina í landinu í dag.

Hann spyr hvort hvetja eigi menn til að snúa til baka frá vélvæðingunni. Menn fái kannski ennþá meiri ívilnun séu menn með árar um borð.