Vill atkvæðagreiðslu um kattahald

Jón Gnarr borgarstjóri vill atkvæðagreiðslu um kattahald í Reykjavík. S. Björn Blöndal, aðstoðarmaður borgarstjóra, segir að ekkert sé búið að ákveða um framkvæmd atkvæðagreiðslunnar en málið sé í skoðun.

„Við erum að velta fyrir okkur hvort það sé gerlegt að vera með atkvæðagreiðslur um ýmis mál, þar á meðal kattahald,“ segir Björn. „Eins og svo margt hjá okkur er þetta hugmynd og er ekki búið að ákveða hvort eða hvernig hún verður framkvæmd. Þetta er dæmi um mál sem margir hafa skoðun á, en við erum með nóg á okkar könnu.“

Atkvæðagreiðsla um hundahald í Reykjavík fór fram í Laugardalshöll árið 1988. Alls voru 68.525 manns á kjörskrá og greiddu 8.777 manns atkvæði. Um sextíu prósent þátttakenda vildu að reglur um hundahald yrðu endurskoðaðar.

Í samþykkt um kattahald frá árinu 2005 kemur meðal annars fram að starfsmönnum Reykjavíkur­borgar er heimilt að handsama ketti ef þeir eru ómerktir, ítrekað sé kvartað undan þeim eða þeir séu innandyra hjá nágrönnum í leyfisleysi. Eigandi kattarins á þá að borga handsömunar-, fóður- og vistunargjald fyrir köttinn áður en hann er afhentur á ný. - sv