Vilja endurbyggja gamlan sjómannaspítala sem hótel

Bæjaryfirvöld í Fjarðabyggð, í samstarfi við Minjavernd og fleiri aðila, hafa í hyggju að flytja rúmlega aldargamlan franskan sjómannaspítala frá Hafnarnesi og endurbyggja húsið á upprunalegum byggingarstað þess á Fáskrúðsfirði. Uppi eru hugmyndir um að tengja húsið við gamla læknabústaðinn á staðnum og starfrækja þar lúxushótel, veitingahús og miðstöð ferðaþjónustu á svæðinu.

Þorsteinn Bergsson, framkvæmdastjóri Minjaverndar, segir að viljayfirlýsing um endurgerð spítalans hafi verið undirrituð í fyrra á Íslandshátíð í Graveline í Frakklandi, sem er vinabær Fáskrúðsfjarðar.

Minjavernd ber ábyrgð á framkvæmdinni í nánu samstarfi við sveitarfélagið en Alliance Francaise hefur milligöngu um samskipti við franskt stjórnkerfi. „Við sjáum áhuga í Frakklandi á að veita fjárstuðning til verksins sem gæti numið allt að helmingi af kostnaði. Gangi það eftir mun Minjavernd standa undir því sem út af stendur.“

Þorsteinn segir það hafa komið skemmtilega á óvart hvað Frakkar sýni verkefninu mikinn áhuga. „Áhugi þeirra á þessari sögu er gríðarlegur sem sést á Íslandshátíðum í gömlu sjómannaþorpunum, eins og Graveline. Haldið verður upp á 25 ára afmæli vinabæjatengsla Fáskrúðsfjarðar og Graveline árið 2012 og vonir standa til að þá verði verkefnið komið vel á veg.“ Spítalahúsið er í mikilli niðurníðslu og margir hafa talið að of seint sé að gera húsið upp. Þorsteinn segir að svo sé ekki og engir meinbugir á því að nýta hluta af viðum hússins.

Jóhann Eðvald Benediktsson, mannvirkjastjóri Fjarðabyggðar, segir að uppbygging spítalans á upprunalegum stað geti orðið mikil lyftistöng fyrir Fáskrúðsfjörð og Fjarðabyggð í heild sinni. „Eins og verkefnið er lagt upp fæst glæsileg götumynd með miklum möguleikum. Þá horfi ég bæði til mannlífs á staðnum og tækifæra í ferðaþjónustu.“ Sveitarfélagið kemur ekki að verkefninu með beinu fjárframlagi heldur leggur til lóðina, og gamla læknisbússtaðinn sem er í eigu sveitarfélagsins.

Að því er stefnt að fjármögnun verksins verði tryggð fyrir 1. október 2010. Heildarkostnaður við flutning og endurgerð hússins er áætlaður um 245 milljónir króna. svavar@frettabladid.is