West Ham sagt tilbúið að hlusta á kauptilboð í Green

Samkvæmt heimildum breska slúðurblaðsins News of the World munu forráðamenn West Ham vera tilbúnir að hlusta á kauptilboð í markvörðinn Robert Green næsta sumar.

Núgildandi samningur Green við Lundúnafélagið rennur út eftir eitt ár og lítið hefur komið út úr viðræðum um framlengingu á samningnum og því segir heimildarmaður blaðsins innan raða West Ham að félagið muni ekki standa í vegi fyrir leikmanninum að fara ef eitt af fjóru stóru félögunum kemur kallandi.

Hinn þrítugi Green hefur verið hjá West Ham síðan árið 2006 þegar hann kom frá Norwich á 2 milljónir punda en markvörðurinn hefur verið fastamaður í landsliðshópi Englands síðustu ár.