Mars er enginn venjulegur mánuður hjá Fulham-liðinu

Enska úrvalsdeildarliðið Fulham er að fara í gegn svakalega leikjadagskrá á næstunni því á þrettán dögum mætir liðið tvisvar sinnum Juventus í Evrópudeildinni og spilar við Manchester City og Manchester United áður en liðið mætir Tottenham í átta liða úrslitum ensku bikarkeppninnar.

Simon Davies fagnar þessu álagi og bendir sínum mönnum á það að hugsa aðeins til baka þegar félagið stóð í harðri fallbaráttu. Hann segir að nú sé öldin önnur og ekki síst vegna komu stjórans Roy Hodgson.

„Við hefðum stokkið á þetta ef einhver hefði boðið okkur þetta fyrir tveimur árum," segir hinn 30 ára gamli Simon Davies.

„Juventus, Manchester United, Manchester City og leikur í átta liða úrslitum bikarsins. Þetta er frábær tími fyrir félagið en ég er viss um að það verður ekki mikið um erfiðar æfingar á þessum tveimur vikum," sagði Davies.

„Við stóðum okkur vel í febrúar sem var erfiður mánuður og mars verður ennþá erfiðari. Það hafa ekki margir okkar komist svona langt í Evrópukeppninni eða bikarnum og því er um að gera að njóta þess," sagði Davies.