Misvísandi dómar skapa réttaróvissu

Misvísandi dómar Hæstaréttar hafa valdið réttar­óvissu þegar kemur til kasta héraðsdómstóla að dæma í brotamálum gegn lögreglumönnum. Tveimur málum af fjórum, af þessum toga, hefur Hæstiréttur nýlega vísað frá, þar sem þau voru rannsökuð í umdæmum lögreglumannanna sem brotið var á. Í hinum tveimur, sem einnig voru rannsökuð í umdæmi brotaþola, dæmdi Hæstiréttur.

Í gær kom til ágreinings í dómsal Héraðsdóms Suðurlands vegna eins slíks máls. Þingfest var ákæra ríkissaksóknara á hendur ungri konu sem ráðist hafði á lögreglukonu. Héraðsdómari vakti máls á því hvort vísa ætti málinu frá héraðsdómi á þeim grundvelli að það lögregluembætti sem rannsakaði málið, það er lögreglan á Selfossi, hafi jafnframt verið sama embætti og lögreglukonan sem varð fyrir líkamsárásinni, starfaði hjá. Kynni það að hafa valdið vanhæfi lögreglustjórans á Selfossi til rannsóknar málsins og því hafi ríkissaksóknara ekki verið heimilt að höfða sakamál fyrir héraðsdómi á grundvelli slíkra rannsóknargagna vegna hins meinta brots.

Við meðferð málsins í gær gerði ríkissaksóknari þá kröfu um að málinu yrði frestað þar til dómur Hæstaréttar lægi fyrir í öðru sams konar sakamáli réttarins um brot gegn valdstjórninni sem á að flytja fyrir Hæstarétti í maí næstkomandi. Fyrirhugað sé að fimm hæstaréttardómarar skipi dóm í því máli og megi þess vænta að skýrari afstaða Hæstaréttar liggi þá fyrir um hvernig fara skuli með rannsókn þessara mála. Var vísað til þess að réttaróvissa væri um meint vanhæfi og vísað til ofangreindra fjögurra ólíkra dóma Hæstaréttar. Verjandi konunnar mótmælti kröfu um að málinu yrði frestað og vildi að dómurinn vísaði því frá. Ríkissaksóknari mótmælti því að málinu yrði vísað frá dómi og krafðist þess að málið fengi frekari efnismeðferð fyrir héraðsdómi vegna framangreindrar réttaróvissu og vísaði meðal annars til þess að mánudaginn 8. febrúar síðastliðinn hefði verið kveðinn upp dómur í Héraðsdómi Vesturlands í Borgarnesi þar sem máli varðandi brot gegn valdstjórninni hefði ekki verið vísað frá héraðsdómi.

Málið var tekið til úrskurðar í gær og beðið er uppkvaðningar dómara Héraðsdómsins á Suðurlandi.

jss@frettabladid.is