Wenger: Svona lagað á ekki heima í boltanum

„Ég er bæði stoltur af því hvernig við spiluðum og svekktur með hvað gerðist fyrir Ramsey. Ég er mjög ósáttur með tæklinguna sem olli þessu. Við höfum misst þrjá leikmenn í slæm meiðsli eftir hræðilegar tæklingar og ég neita að trúa því að þetta sé bara óheppni í okkur.

Það er allt í lagi að berjast en svona lagað á ekki heima í boltanum," sagði knattspyrnustjórinn Arsene Wenger hjá Arsenal eftir 1-3 sigur sinna manna gegn Stoke en Aaron Ramsey fótbrotnaði í leiknum eftir grófa tæklingu frá Ryan Shawcross.

„Auðvitað voru menn skelkaðir eftir að hafa orðið vitni að þessu atviki en það sýnir hversu sterkir við erum andlega að menn héldu haus og kláruðu verkefnið. Við unnum leikinn fyrir Ramsey," sagði Wenger í leikslok í kvöld.