Fjögur skipti vann Gyllta lundann

RIFF kvikmyndahátíðin náði hápunkti þegar að verðlaunaafhending fór fram í fullum sal í Háskólabíó í gærkvöld. Ítalska myndin „Fjögur skipti" vann Gyllta lundann, aðalverðlaun hátíðarinnar. Að lokinni verðlaunaafhendingu var kvikmyndin Brim svo frumsýnd en það er nýjasta afurð Vesturports leikhópsins.

Þá hlaut rúmenska kvikmyndin „Á morgun" eftir leikstjórann Marian Crisan kvikmyndaverðlaun kirkjunnar sem voru veitt í fimmta sinn á Alþjóðlegri kvikmyndahátíð í Reykjavík. Í umsögn dómnefndar um myndina segir að um sé að ræða látlausa kvikmynd með kröftugum undirtóni. Þetta sé mynd um vináttu tveggja manna, sem tali ekki sama tungumál, en skilji hvorn annan. Myndin takist á við knýjandi spurningar um landamærin milli þjóða og fólks, um stöðu innflytjenda og flóttamanna og um virðingu fyrir þeim sem séu Íslendingum framandi.

RIFF hátíðinni lýkur í dag.