Vill lækka laun skilanefndarmanna

Fjármálaráðherra ætlar að beita sér fyrir því að laun skilanefndarmanna bankanna verði lækkuð. Ofurlaun þeirra sendi röng skilaboð út í samfélagið.

Skilanefndarmenn og slitastjórnendur gömlu bankanna fengu að meðaltali þrjár til fimm milljónir króna í laun á mánuði í fyrra. Þetta kemur fram í Fréttablaðinu í gær.

Skilanefndir þurfa að gera óformlegu kröfuhafaráði grein fyrir öllum kostnaði. Íslenska ríkið er í hópi kröfuhafa.

Steingrímur J. Sigfússon, fjármálaráðherra, segir að launakröfur skilanefndamanna sendi röng skilaboð út í samfélagið. Menn verði að sýna hófsemi.

„Mér finnst þetta mjög háir reikningar alveg dæmalaust háir ef þessar fjölmiðlafréttir eru réttar. Og þær eru á skjön við veruleika liðandi stundar þar sem launafólk í landinu almennt þarf að sætta sig við," sagði Steingrímur um launin.

Steingrímur segist ætla að beita sér fyrir því að laun skilanefndarmanna og slitastjórnenda verði lækkuð.

„Mér finnst rétt og skylt að fara yfir þetta og hvort ríkið geti með einhverjum ráðum, þá í gegnum aðkomu fjármálaeftirlits og efnhags- og viðskiptaráðuneytis eða þá að ríkið sem kröfuhafi geti beitt sér til þess að reyna tryggja það að launaákvarðanir almennt í samfélaginu taki tillit til veruleika dagsins í dag en ekki á liðnum tíma," sagði Steingrímur að lokum.