Owen Coyle ætlar að standa með Elmander

Owen Coyle, stjóri Bolton, hvetur Svíann Johan Elmander til að missa ekki trúna á eigin ágæti þrátt fyrir að vera hreinlega fyrirmunað að skora. Elmander hefur skorað tvö mörk í úrvalsdeildinni á tímabilinu og hefur ekki að margra mati staðið undir kaupverðinu frá franska liðinu Toulouse.

Owen Coyle er ánægður með frammistöðu Svíans þrátt fyrir að hann sé ekki að skora mörk fyrir Bolton-liðið. Bolton mætir Wigan í fallbaráttuslag í kvöld og þarf nauðsynlega á mörkum frá Elmander að halda.

„Kannski er Johan að reyna of mikið," segir Owen Coyle. „Hann er búinn að standa sig frábærlega hvað varðar vinnusemi og dugnað. Hann er búinn að koma sér í fullt af færum á eigin spýtur og ég hef sagt honum að halda áfram að gera það sem hann er að gera," segir Coyle.

„Það er hægt að hrósa Johani fyrir margt en sóknarmaður er engu að síður dæmdur eftir fjölda marka sem hann skorar. Hann verður bara að halda trúnni á sjálfan sig og vonandi fer hann að skora þessi mörk sem hann hefur svo sannarlega unnið sér fyrir,"segir Coyle.