Fíkniefnasmyglarar dæmdir

Tveir fíkniefnasmyglarar voru dæmdir í fangelsi í Héraðsdómi Reykjaness í gær.

Tvítugur karlmaður frá Rúmeníu var dæmdur í fimmtán mánaða fangelsi og pólskur ríkisborgari var dæmdur í tólf mánaða fangelsi.

Fyrrnefndi maðurinn stóð hinn 4. desember á síðasta ári, að innflutningi á tæpum 500 grömmum af kókaíni, sem ætlað var til sölu í ágóðaskyni hér á landi.

Maðurinn flutti fíkniefnin til landsins frá Belgíu með millilendingu í Kaupmannahöfn. Hann kom með þau til landsins sem farþegi og fundust þau í meltingarvegi hans við eftirlit.

Síðarnefndi maðurinn flutti 7. janúar síðastliðinn rúm 640 grömm af amfetamíni til landsins. Þessi maður faldi efnin einnig innvortis. Hann kom hingað til lands frá Varsjá í Póllandi.

Mennirnir hafa báðir setið í gæsluvarðhaldi á Litla-Hrauni frá því að þeir voru handteknir. Annar þeirra hafði setið í gæsluvarðhaldi frá 7. janúar og hinn frá 5. desember. Gæsluvarðhaldstími þeirra dregst frá fangelsisrefsitímanum. - jss