Fjórðungi færri skipta um bíl

Ríflega fjórðungi færri eigendaskipti urðu á ökutækjum fyrstu 45 daga ársins en á sama tíma í fyrra, samkvæmt upplýsingum Umferðarstofu. Í ár urðu eigendaskipti á 6.861 ökutæki, samanborið við 9.247 í fyrra. Munurinn er 25,8 prósent.

Þá kemur fram í tilkynningu Umferðarstofu að mikill samdráttur í nýskráningu ökutækja haldi áfram það sem af er þessu ári. Þegar tölurnar eru skoðaðar kemur í ljós að í janúar 2008 voru nýskráð ökutæki 2.575 talsins, árið 2009 voru þau 325 og í janúar í ár voru þau 212.

„Frá 1. janúar til 15. febrúar hafa 316 ökutæki verið nýskráð en þau voru 444 eftir jafn langt tímabil á síðasta ári. Þetta eru rétt tæplega 29 prósentum færri ökutæki milli ára,“ segir Umferðarstofa, en áréttar um leið að um sé að ræða allar tegundir skráðra ökutækja.

„Ef þessar tölur eru bornar saman við fyrstu 46 daga ársins 2005, en það ár var mesti fjöldi nýskráninga, kemur í ljós að þá voru skráð 2.937 ökutæki, um það bil níu sinnum fleiri en það sem af er árinu 2010.“ Bent er á að fjöldi nýskráninga ökutækja sé nú í byrjun árs aðeins tæp 11 prósent þess fjölda sem skráður var í upphafi árs 2005. - óká