Smíða reiknivél vegna gengisdómsins

„Frá því dómur Hæstaréttar féll hefur umræða tengd gengistryggðum bílalánasamningum verið mjög ruglingsleg. Við ákváðum því að smíða reiknivél svo fólk geti séð svart á hvítu hvaða áhrif þær leiðir sem ræddar hafa verið hafa á lán fólks," segir Ingólfur H. Ingólfsson, stjórnarformaður ráðgjafarfyrirtækisins Sparnaðar.

Tæpur hálfur mánuður er síðan dómur Hæstaréttar féll þar sem fram kemur að óheimilt hafi verið að tengja bílalán í krónum við erlenda myntkörfu.

Margir hafa gagnrýnt fjármögnunarfyrirtækin fyrir gengistrygginguna, sem bönnuð hefur verið með lögum frá því Alþingi samþykkti lög um vexti og verðtryggingu árið 2001. Lánin bera á bilinu tveggja til þriggja prósenta vexti að viðbættu álagi. Á meðal háværustu gagnrýnenda eru Gylfi Magnússon, efnahags- og viðskiptaráðherra, og Már Guðmundsson seðlabankastjóri, sem báðir segja að hagstæðustu vextir Seðlabankans eigi að taka við af gengislánunum.

Forsvarsmenn fjármögnunarfyrirtækjanna segja erfitt að finna viðmiðun við útreikninga á gengistryggðum lánasamningum og hafa krafið stjórnvöld um að grípa í taumana þar til Hæstiréttur dæmir í sambærilegum málum sem gætu skýrt hvert framhaldið verður.

Ingólfur segir stjórnvöld hafa flækt málið frekar en hitt og því hafi fyrirtæki hans ákveðið að stíga fram á sviðið með reiknivél sem lántakendur geta nýtt til að reikna út áhrifin af þeim mismunandi leiðum sem rædd hafa verið síðasta hálfan mánuðinn.

„Þetta er flókið mál en alveg mögulegt," segir Árni Gunnar Vigfússon, ráðgjafi hjá Sparnaði. Hann segir fjármálaverkfræðing hafa unnið sleitulítið að smíði reiknivélarinnar frá því á miðvikudag í síðustu viku. Hann segir fjármögnunarfyrirtækin og bankana eiga að geta búið til sambærilega vél, þau hafi sérfræðinga í vinnu til þess. Fyrirtækið er nú langt komið með smíði reiknivélar sem nota má til að reikna út áhrif mismunandi leiða á gengistryggð íbúðalán.

Í reiknivél Sparnaðar má sjá hver staða gengistryggðra bílalána er í dag og skoða hver áhrifin verða við að samningsvextir eru látnir standa eða hvort verðtryggðir vextir Seðlabankans eða óverðtryggðir taka við. Útreikningarnir eru eingöngu til viðmiðunar og umhugsunar fyrir fólk til að gera sér grein fyrir stöðunni.

Netverjar sem áhuga hafa á að skoða áhrif mismunandi leiða á

gengistryggð lán sín verða að skrá sig á heimasíðu Sparnaðar áður en þeir geta skoðað reiknivélina. Svo mikill heimsóknafjöldi var á heimasíðu fyrirtækisins í gær að tölvukerfi þess hrundi, að sögn Ingólfs.

jonab@frettabladid.is