Hjálpa íslenskum konum að láta draumana rætast

Sigrún Lilja Guðjónsdóttir, framkvæmdastjóri og hönnuður Gyðju Collection, fór nýverið til Los Angeles til að kynna skólínu sína. Með henni í för var förðunarfræðingurinn og hárgreiðslukonan Berglind Magnúsdóttir sem sér um útlit sjónvarpsstjarnanna á RÚV.

„Það var frábært að njóta hennar dyggu aðstoðar og líta alltaf "tip-top" út þarna ytra," segir Sigrún. Stöllurnar segja þetta hafa verið mikla ævintýraferð. „Við fórum meðal annars í teiti hjá tímaritinu Vanity Fair þar sem við spjölluðum lengi við Leonardo DiCaprio en hann var einstaklega alúðlegur og áhugasamur um Ísland."

Samstarf Sigrúnar og Berglindar hefur nú leitt af sér námskeið fyrir konur sem mun eiga sér stað í lok maí. „Ég hef fengið mikið af tölvupósti undanfarið frá konum sem langar að vita hvernig þær eiga að láta drauma sína rætast og þetta hefur aukist hægt og þétt. Ég setti saman stutt námskeið sem er sérstaklega hugsað fyrir konur. Ég miðla af minni reynslu og setti saman markvisst kerfi til þess að setja saman hnitmiðaðar leiðir að markmiðum hverrar konu sem kemur á námskeiðið. Þetta eru erfiðir tímar og það er mikilvægt að fólk vinni í því að byggja sjálft sig upp," útskýrir Sigrún.

Sigrún bætir við að útlit komi sjálfstrausti ekki síður við og því sameini þær Berglind krafta sína. „Berglind er einstaklega flink og með frábæra reynslu og við förum yfir allt sem lýtur að klæðaburði, stíl og förðun."

Berglind segist fara yfir förðun hverrar og einnar konu og kenna þeim leiðir til að greiða sér smekklega.

„Ég fer yfir umhirðu húðar og hárs og hvaða litir á snyrtivörum henta þeim og jafnvel hvernig á að setja á sig gerviaugnahár." Innifalið í námskeiðinu er kvöldverður í boði Saffran og hver kona er leyst út með veglegum gjöfum.

„Í lok námskeiðsins bjóðum við upp á myndatöku með ljósmyndaranum Önnu Douglas og hver kona fær tvær fullunnar myndir af sjálfri sér sem getur til dæmis nýst í starfsumsóknir."

Áhugasamir eru beðnir að hafa samband með því að senda tölvupóst á gydja@gydja.is eða á Facebook-síðu námskeiðsins. -amb