John Jensen: Arsenal getur unnið sjö leiki í röð og tekið titlinn

John Jensen, fyrrum leikmaður Arsenal og danska landsliðsins, er í viðtali við vefmiðilinn goal.com þar sem hann spáir í endasprettinn hjá Arsenal í ensku úrvalsdeildinni. Hann segir að leikjadagskrá liðanna bjóði upp á tækifæri fyrir hans gamla lið að vinna titilinn.

John Jensen segir að Arsenal eigi sex af næstu sjö leikjum sínum á móti liðum í neðri hluta deildarinnar á sama tíma og Manchester United þar að mæta liðum eins og Everton og Liverpool á leið Chelsea að titlinum eru leikir við sterk lið eins og Manchester City og Aston Villa.

„Þetta verða erfiðir leikir fyrir Manchester United og Chelsea og það gæti nýst Arsenal vel í baráttunni," segir John Jensen sem var meðal áhorfenda þegar Arsenal vann sinn mikilvæga sigur á Liverpool í síðustu umferð.

„Það var rosalega mikilvægur sigur og þetta var ekki aðeins spurning um að fá þessi þrjú stig. Þessi sigur gefur Arsenal-liðinu trúna á það á ný að þeir geti orðið meistarar," segir Jensen.

Arsenal á eftir þessa leiki: Sunderland (heima), Stoke City (úti), Burnley (heima), West Ham (heima), Birmingham City (úti) og Wolves (heima).