Karl gerir aðra stórmynd með Bigelow

„Þetta verður ekki mikið stærra en þetta," segir leikmyndahönnuðurinn Karl Júlíusson. Karl er á leiðinni til Suður-Ameríkulandanna Argentínu og Síle að gera leikmynd fyrir kvikmynd Óskarsverðlaunahafans Kathryn Bigelow. Myndin gengur undir vinnuheitinu Sleeping Dogs en Johnny Depp og Óskarsverðlaunahafinn Tom Hanks munu að öllum líkindum leika aðalhlutverkin.

Bigelow hlaut Óskarinn á þessu ári fyrir kvikmyndina The Hurt Locker, sem Karl gerði einnig leikmyndina fyrir en þar breytti hann meðal annars Amman í Jórdaníu í Bagdad. Karl hlaut hin virtu Art Directors Guild verðlaun fyrir leikmyndina en það eru samtök leikmyndahönnuða í Bandaríkjunum.

Karl varð að hafna tilboði frá góðvini sínum Baltasar Kormáki sem vildi fá hann í Contraband, Hollywood-myndina sína, með Mark Wahlberg og Kate Beckinsale. „Ég er bara að bíða eftir græna ljósinu og reikna með að fara af stað eftir tvær vikur. Ég hafði mikinn áhuga á að gera myndina með Balta en var því miður upptekinn," segir Karl í samtali við Fréttablaðið.

Hann segir myndina vera samtímamynd, hún eigi að gerast á landamærasvæðinu hjá Paragvæ, Brasilíu og Argentínu og þetta verði svona „sígild og vitræn hasarmynd", eins og hann kemst að orði.

Bigelow hefur nú töluvert meira á milli handanna eftir velgengni The Hurt Locker, sem hlaut alls sex Óskarsverðlaun, en hún var gerð fyrir aðeins ellefu milljónir dala. Upphæðin að þessu ætti því að vera töluvert hærri.

Karl stígur þó varlega til jarðar, enda eru aðeins örfáir dagar síðan gjaldþrot kvikmyndarisans MGM var tilkynnt. „Hollywood-karlarnir fara að öllu með gát núna, menn eru varkárari en þeir hafa verið," segir Karl, sem reiknar með töluverðri vinnu í kringum myndina.

„Það þarf alltaf að byggja eitthvað," segir hann en Bigelow hefur óskað eftir starfskröftum eiginkonu Karls, Áslaugar Konráðsdóttur, sem vann einnig að gerð The Hurt Locker.

freyrgigja@frettabladid.is