Með risaverksmiðju á sveitabæ

Lögreglustjórinn á Austurlandi hefur ákært fjóra karlmenn fyrir Héraðsdómi Austurlands fyrir kannabisræktun og jafnframt að hafa komið sér upp mikilvirkri kannabisverksmiðju, þar sem hefði verið hægt að rækta allt að sex hundruð kannabisplöntur í senn.

Mennirnir höfðu komið sér fyrir á bænum Karlsstöðum á Berufjarðarströnd, sem einn þeirra hafði umráð yfir. Þeir eru allir frá Reykjavík og um þrítugt.

Mennirnir eru ákærðir fyrir að hafa, í sölu- og dreifingarskyni, ræktað sextán kannabisplöntur sem vógu samtals 8,8 grömm og fyrir tilraun til stórfellds brots gegn lögum um ávana- og fíkniefni, með því að setja upp mjög stóra ræktunaraðstöðu fyrir allt að 600 kannabisplöntur, sem lögreglan fann þar við leit 6. maí 2009.

Auk refsingar yfir mönnunum er krafist upptöku á umfangsmiklum búnaði sem mennirnir höfðu komið sér upp á bænum. Upptalning á búnaði mannanna er í tæplega sjötíu liðum.

Þar á meðal er viðamikill ljósabúnaður, einkum gróðurhúsalampar, dælubúnaður og viftur.

- jss