Þúsundir mótmæla hugsanlegri lokun Sólheima

Á sjötta þúsund manns mótmæla því á Facebook að Sólheimum í Grímsnesi, samfélagi þroskahamlaðra, verði lokað. Það er fyrrverandi starfsmaður Sólheima sem stofnaði til síðunnar sem ber yfirskriftina:

„Nei þetta látum við EKKI gerast hjálpum fólkinu á Sólheimum."

Stofnandi síðunnar segir í ákalli til almennings að íbúar á Sólheimum þurfti nauðsynlega á stuðningi að halda. Á heimasíðu Sólheima er þakkað fyrir þann gríðarlega stuðning sem samfélaginu hefur borist síðan fregnir um lokun Sólheima voru fyrst fluttar.

Framkvæmdastjórn og fulltrúaráð Sólheima hefur fjallað ítarlega um væntanlegar breytingar á þjónustu við fatlaða vegna flutnings ríkisins á málefnum fatlaðra til sveitarfélaga.

Verði breytingar þessar að lögum um næstu áramót er brostinn grundvöllur fyrir starfi Sólheima að málefnum fatlaðra nema því aðeins að ríkið tryggi þjónustu Sólheima í búsetu og atvinnumálum með samkomulagi til 2014 að mati stjórnarinnar.

Guðbjartur Hannesson, félags- og tryggingamálaráðherra, sagði á Vísi fyrir helgi að hann hefði ekki náð að kynna sér umkvörtunarefni stjórnenda Sólheima. Það væri þó skýrt að Sólheimum verði ekki lokað.