Grindvíkingum hugsanlega gefinn kostur á námi í heimabyggð

Til greina kemur að stofna framhaldnámsdeild í Grindavík, að sögn Katrínar Jakobsdóttur menntamálaráðherra. Katrín segir að horft sé til svipaðs fyrirkomulags og á Þórshöfn. Þar hefur Framhaldsskólinn að Laugum starfrækt framhaldsdeild frá síðasta hausti.

Katrín segir að þetta fyrirkomulag, sem sé til skoðunar, gefi nemendum tækifæri á því að stunda nám í sinni heimabyggð. Mikill áhugi sé fyrir þessu fyrirkomulagi víða utan höfuðborgarsvæðisins.

Katrín segir að með þessu fyrirkomulagi sé gert ráð fyrir að nemendaígildi verði flutt á milli, en fjölgi ekki. Þessu fyrirkomulagi ætti því ekki að fylgja verulegur kostnaðarauki fyrir ríkissjóð.

Ekki hefur verið ákveðið hvaða skóli mun starfrækja framhaldsdeildina í Grindavík.