Þriðjungur heimila er í vanda

Búast má við að tæplega þriðjungur íslenskra heimila safni upp skuldum, gangi á eignir til að standa undir daglegri neyslu og afborgunum af lánum, eða hafi dregið svo mikið úr neyslu að lágmarksviðmið samfélagsins eiga ekki við hjá þeim.

Þetta kemur fram í úttekt sem unnin var fyrir Neytendasamtökin. Niðurstöður úttektarinnar, sem unnin var af Kjartani Brodda Bragasyni hagfræðingi, benda til þess að Seðlabankinn og aðrir opinberir aðilar ofmeti greiðslugetu íslenskra heimila.

Þegar tekið hefur verið tillit til „eðlilegra neyslustaðla“ er töluverð hætta á greiðsluþroti hjá töluverðum hluta þeirra skuldsettu heimila sem eru með lægstu ráðstöfunartekjurnar, að því er fram kemur í skýrslunni.

Tekjulægsti hópurinn, sem telur tæplega 11 þúsund heimili, um níu prósent íslenskra heimila samkvæmt skýrslunni, er með um 235 þúsund krónur í ráðstöfunartekjur þegar tekið hefur verið tillit til vaxta- og barnabóta.

Þennan hóp vantar um 129 þúsund krónur á mánuði til að borga fyrir daglega neyslu og til að greiða vaxtakostnað af lánum. Þessi hópur þarf því annaðhvort að ganga hratt á eignir, taka lán fyrir neyslu, eða draga verulega úr neyslu sinni. - bj