Arsenal skaust á toppinn með tíu menn

Þrátt fyrir að leika einum manni færri allan seinni hálfleik vann Arsenal sigur á West Ham 2-0 í Lundúnaslag. Arsenal er þar með komið á topp deildarinnar en Manchester United og Chelsea eiga sína leiki á morgun.

Denilson kom Arsenal yfir eftir samleik við Nicklas Bendtner strax á fimmtu mínútu leiksins. Undir blálok fyrri hálfleiksins fékk West Ham svo vítaspyrnu.

Thomas Vermaelen var dæmdur brotlegur og fékk að líta rauða spjaldið. Manuel Almunia, markvörður Arsenal, gerði sér lítið fyrir og varði vítaspyrnu Alessandro Diamanti frábærlega.

Einum færri náði Arsenal að halda marki sínu hreinu og bætti við öðru marki á 83. mínútu þegar Cesc Fabregas skoraði úr vítaspyrnu. Vítið var dæmt eftir að Matthew Upson handlék knöttinn innan teigs.