1000 börn skráð í sumarbúðir KFUM og -K í dag

Opnað var fyrir skráningu í sumarbúðirnar Vatnaskóg, Vindáshlíð, Ölver, Kaldársel og Hólavatn í dag. Samkvæmt upplýsingum frá KFUM og -K sem reka sumarbúðirnar var aðsóknin svo mikil að skráningarkerfið hrundi í hádeginu. Í fyrsta sinn í ár verður hægt að skrá börnin á Netinu. Verið er að vinna að lagfæringum á kerfinu og verður áfram hægt að skrá í gegnum netið eftir helgina.

Í dag var skráð af fullum krafti í þjónustumiðstöð félagsins og í gegnum síma og voru hátt í 1000 börn skráð þennan fyrsta skráningardag, samkvæmt upplýsingum frá skrifstofu KFUM og -K.

Sumarbúðir KFUM og -K hafa notið vinsælda um margra árabil en félagið rekur sumarbúðir í Vatnaskógi, Vindáshlíð, Ölveri, Kaldárseli og Hólavatni.