Ballack: Ákvörðun Roman að ég ætti að fara

Michael Ballack segir að það hafi verið ákvörðun Roman Abramovich, eiganda Chelsea, að bjóða honum ekki nýjan samning við félagið.

Samningur Ballack við Chelsea rennur út í sumar og var greint frá því í gær að honum, ásamt Joe Cole og Juliano Belletti, yrði ekki boðinn nýr samningur.

„Það var óheppilegt að við náðum ekki saman en ég verð nú loka þessu máli," sagði Ballack við enska fjölmiðla. „Ég hef vitað í þó nokkurn tíma að samningaviðræðum hefði verið hætt og ég verð nú að halda áfram og finna mér nýtt félag."

„Það var þó alltaf fyrsti kostur minn að vera áfram hjá Chelsea enda var ég þar í fjögur frábær ár og ég naut hverrar mínútu. Það er enn minn fyrsti kostur í dag en þetta er ekki undir mér komið. Það var Roman sem tók þessa ákvörðun."

Ballack verður ekki með þýska landsliðinu á HM í sumar vegna meiðsla en segir að hann hafi engan áhuga að slaka á með því að fara til Bandaríkjanna eða Dubai, eins og hann orðaði það sjálfur.

„Ég vil vera áfram í Evrópu. Ég er stoltur af því að vera Þjóðverji og mér hefur alltaf liðið vel í Þýskalandi. Mér standa því til boða ýmsir kostir heima," sagði hann en Ballack hefur að undanförnu verið orðaður við Wolfsburg.