Nauðgaði barnapíunni - dómur þyngdur um eitt ár

Hæstiréttur hefur þyngt dóm yfir karlmanni á fertugsaldri, Gísla Birgissyni, sem var dæmdur í tveggja og hálfs árs fangelsi í héraðsdómi fyrir kynferðisbrot gegn stúlku sem þá var fjórtán ára en hann þrjátíu og tveggja. Hæstiréttur þyngdi dóminn um eitt ár, og var hann því dæmdur í þriggja og hálfs árs fangelsi.

Í dómnum segir að hann hafi nýtt sér yfirburðastöðu sína gagnvart stúlkunni og neytt hana í skjóli þess til að hafa við sig kynferðismök í læsti bifreið á afviknum stað. Þar segir einnig að maðurinn eigi sér engar málsbætur. Hann var jafnframt dæmdur til að greiða stúlkunni 800 þúsund krónur í miskabætur.

Athæfið átti sér stað í maí á síðasta ári. Stúlkan hafði nokkrum sinnum gætt barns fyrir manninn og konu hans. Áður en brotið átti sér stað hafði hann ástundað að hringja í stúlkuna án ástæðu og einnig áttu þau samskipti á MSN. Kvöldið sem kynferðisbrotið var framið var stúlkan að passa og maðurinn ætlaði að keyra hana heim. Þess í stað ók hann með hana að verksmiðjuhúsnæði í Grafarvogi þar sem hann áreitti hana kynferðislega í bílnum.

Málið komst upp nokkru síðar þegar stúlkan sagði bróður sínum og kærustu hans að maðurinn sem hún hefði verið að passa fyrir hefði nauðgað sér.