Reyna að rýma til fyrir strandaglópa

Bresk flugfélög biðja nú farþega sem eiga bókað far um helgina um að fresta heimferð sinni til að skapa pláss fyrir þá farþega sem urðu strandaglópar vegna eldgossins í Eyjafjallajökli.

Mörg þúsund bretar eru enn strandaglópar eftir að flugvöllum í Bretlandi var lokað vegna eldgossins í Eyjafjallajökli. Flugfélögin þurfa að minnsta kosti viku til að koma áætlunarflugi í eðlilegt horf.

Fram kemur á vef breska ríkisútvarpsins, BBC, í dag að farþegar sem eiga bókað far um helgina hafa verið beðnir um að fresta heimför sinni til að flugfélögin geti komið þeim fyrst heim sem beðið hafa lengst.

Öskuský frá eldgosinu í Eyjafjallajökli varð til þess að loka þurfti flugvöllum víða í Norður - Evrópu og um tíma lá allt millilandaflug til og frá Bretlandseyjum niðri.

Bresk flugfélög hafa gripið til þess ráðs að fjölga flugferðum til að sækja strandaglópa en það virðist ekki duga til og þess vegna hafa farþegar, sem ekki urðu fyrir töfum vegna eldgossins, verið beðnir um fresta heimför sinni í nokkra daga. Ekki kemur fram á vef BBC hvort farþegar hafi tekið vel í þessa beiðni flugfélaganna.