Hvetja fólk í áhættuhóp til að láta kanna HIV smit

Smitsjúkdómadeild Landspítalans hvetur til þess að fólk sem deilt hefur nálum eða stundað óábyrgt kynlíf undanfarin misseri láti athuga hvort það hafi smitast af HIV-veirunni. Sóttvarnarlæknir rannsakar hvort fjölgun HIV-smitaðra hér á landi megi hugsanlega rekja til einnar stúlku.

Í fréttum Stöðvar 2 í fyrrakvöld var greint frá því að Landlæknisembættinu tókst ekki að koma lögum yfir unga HIV-smitaða konu sem grunur lék á að hefði smitað aðra með skeytingarlausri hegðun.

Málið hófst árið 2007 en þá var nýgengi HIV smitaðra mjög mikið meðal sprautufíkla. Ótti vaknaði hjá starfsmönnum Landlæknisembættisins vegna þessa og beindist athyglin að ungu konunni. Reynt var að veita henni aðstoð á grundvelli sóttvarnarlaga en aðstoðinni hafnaði hún alfarið og fór málið fyrir héraðsdóm. Þar var úrskurðað um að konan hefði sinn rétt og ekki væri hægt að þvinga hana til að þiggja aðstoð heilbrigðisyfirvalda og fór hún sína leið.

Sóttvarnarlæknir segir að rannsakað sé hvort fjölgun HIV-smitaðra hér á landi megi hugsanlega rekja til þessa máls. En í fyrra greindust þrettán manns með veiruna og var yngsta manneskja í þeim hópi aðeins sautján ára. Fimm úr hópi smitaðra voru fíkniefnaneytendur.

Bergþóra Karlsdóttir hjúkrunarfræðingur á smitsjúkdómadeild hvetur fólk sem hefur deilt nálum eða stunda óvarin kynmök með fólki í áhættuhóp að leita sér aðstoðar hið fyrsta. Það geti haft samband við göngudeild smitsjúkdómadeildar og farið í próf sér að kostnaðarlausu.

Hún segir þróunina geigvænlega og harmar það að vopn í baráttunni gegn HIV hafi verið slegin úr höndum heilbrigðisstarfsmanna með dóminum árið 2007. Nú sé aðeins hægt að hvetja fólk til að nota smokinn og deila ekki nálum en slíkar ráðleggingar dugi þó oft skammt.