Þorleifur kærir utankjörfundaratkvæðagreiðsluna

Þorleifur Gunnlaugsson sem lenti í öðru sæti í forvali Vinstri grænna fyrir borgarstjórnarkosningarnar í Reykjavík hefur kært utankjörfundaratkvæðagreiðsluna.

Þetta staðfestir Stefán Pálsson, formaður kjörstjórnar. „Við förum yfir málið á fundi síðar í dag," segir Stefán. Hann bætir því við að öllum sé heimilt að gera athugasemdir við framkvæmd forvalsins á meðan kærufrestur er enn í gildi, og ekkert óeðlilegt við það. Hins vegar hafi málið engin áhrif á niðurstöðu forvalsins þar sem viðbúið sé að röð sex efstu standi óbreytt enda þótt utankjörfundaratkvæðin yrðu tekin út í heild sinni.

Þorleifur, sem verið hefur oddviti VG í borgarstjórn á hluta kjörtímabilsins tapaði í forvalinu fyrir Sóleyju Tómasdóttur sem verið hefur í öðru sæti borgarstjórnarlistans.