Vill meirihlutastjórn með íhaldsmönnum

Leiðtogi Frjálslyndra demókrata í Bretlandi hyggst ræða við Íhaldsflokkinn um myndun nýrrar ríkisstjórnar fái enginn flokkur meirihluta í komandi þingkosningum.

Með óvæntri velgengni Nick Cleggs, leiðtoga Frjálslyndra demókrata, í sjónvarpskappræðum leiðtoga þriggja stærstu flokkanna er kosningabaráttan á Bretlandi orðin mun meira spennandi en útlit var fyrir þegar íhaldsmenn virtust ætla að sigra Verkamannaflokkinn örugglega.

Nú þegar tíu dagar eru til kosninga mælast Íhaldsflokkurinn, Verkamannaflokkurinn og Frjálslyndir demókratar með álíka mikið fylgi. Þær kannanir sem birtar voru um helgina sýna þó að íhaldsmenn hafa forskot á andstæðinga sína og að Verkamannaflokkurinn mælist með einna minnst fylgi. Haldist staðan óbreytt mun enginn flokkur fá hreinan meirihluta í þingkosningunum 6. maí.

Clegg segir að fái flokkur sinn næstflest atkvæði muni hann snúa sér til Davids Camerons, leiðtoga Íhaldsflokksins, og ræða við hann um myndun nýrrar ríkisstjórnar. Verði Verkamannaflokkurinn þriðji stærsti flokkur Bretlands eftir kosningarnar telur Clegg að flokkurinn eigi ekki að koma að stjórn landsins á næstu árum.