Rauðstakkar búa sig undir ný átök

Rauðstakkar í Taílandi bjuggu sig í gær undir átök við lögreglu og her, eftir að Abhisit Vejajiva forsætisráðherra hafði hafnað sáttaboði þeirra, sem fólst í því að mótmælum yrði hætt ef þing landsins yrði leyst upp.

Mótmælendurnir höfðu lagt undir sig eina götu í Bangkok og hafst þar við í 23 daga. Búist var við að stjórnvöld myndu láta sverfa í stál til að rýma götuna.

Til harðra átaka kom í götunni á fimmtudag og lét þá að minnsta kosti einn maður lét lífið, en 10. apríl höfðu 25 manns látist þegar herinn reyndi að rýma búðir sem mótmælendur hafa komið sér þar upp.

„Rauðstakkarnir eru lýðræðishreyfing fyrst og fremst, þótt margir þeirra séu stuðningsmenn Thaksins, fyrrverandi forsætisráðherra,“ segir Viktor Sveinsson, sem býr í Taílandi og rekur þar ferðaskrifstofuna Óríental. „Þeir krefjast þess að núverandi stjórn, sem óneitanlega situr í skugga valdaráns hersins, fari frá völdum.“

Thaksin Shinavatra hlaut yfirburða kosningu árið 2001 en var hrakinn frá völdum haustið 2006 eftir langvarandi mótmæli gulstakka. Allar götur síðan hafa svonefndir rauðstakkar og gulstakkar skipst á um að standa fyrir mótmælum í landinu gegn stjórnvöldum, allt eftir því hvort forsætisráðherrann hefur verið hliðhollur Thaksin eða ekki.

„Gulstakkarnir eru hins vegar konungssinnar númer eitt, tvö og þrjú,“ segir Viktor, sem fylgist vel með gangi mála í Bangkok þótt hann búi í Hua Sin, strandbæ um 200 kílómetrum suður af höfuðborginni.

Konungssinnar voru frá upphafi ósáttir við Thaksin, enda kom hann ekki úr röðum valdaklíkunnar í kringum konunginn eins og fyrri forsætisráðherrar höfðu gert.

„Annars verður nú að segja að pólitíkin í Taílandi ristir ekkert ofboðslega djúpt. Stemningin skiptir oft öllu máli og fólk klæðir sig upp í afgerandi litum eftir því með hverjum það er í liði,“ segir Viktor.

„Síðan bíða allir eftir því hvað herinn gerir, en hann hefur gert valdarán sautján eða átján sinnum síðan landið hætti að vera hreint konungsríki.“ gudsteinn@frettabladid.is