Stórsigur hægrimanna í Ungverjalandi

Hægriflokkurinn Fidesz vann stórsigur í seinni umferð þingkosninganna í Ungverjalandi sem fóru fram í gær. Sósísalistaflokkurinn sem hefur haft meirihluta á ungverska þinginu síðustu átta ár galt afhroð og fékk einungis rúmlega 15% atkvæða. Hægriflokkurinn fékk aftur á móti tvo þriðju þingsæta og því er ljóst að hann getur knúið í gegn róttækar breytingar við stjórn landsins.

Í kosningabaráttunni hét Viktor Orban, formaður Fidesz og fyrrverandi forsætisráðherra, Ungverjum skjótum efnahagsbata, fleiri störfum og lægri sköttum. Með sigrinum getur flokkurinn auk þess breytt stjórnarskrá landsins án þess að þurfa að semja við aðra flokka.