Lítið um efndir ráðamanna

„Það sígur áfram á ógæfuhliðina. Mannvirkjagerðin er á hliðinni og fátt sem bendir til að sú skúta fari að rétta sig af."

Þetta segir Jón Steindór Valdimarsson, framkvæmdastjóri Samtaka iðnaðarins, um ástand mála í byggingariðnaði. Gjaldþrot í greininni eru algeng og uppsagnir hjá þeim sem eftir standa tíðar. Sem dæmi má nefna að þrettán var sagt upp hjá verktakafyrirtækinu Magna í síðustu viku og var haft eftir forstjóra félagsins á RÚV að líklega yrði þeim sem eftir stæðu sagt upp um næstu mánaðamót.

Jón Steindór átelur stjórnvöld fyrir seinagang. Til hafi staðið að bjóða út tilteknar vegaframkvæmdir í heilt ár án þess að nokkuð hafi gerst. Sama eigi við um samgöngumiðstöð á Reykjavíkurflugvelli.

„Hún var fyrsta framkvæmdin sem átti að ráðast í eftir hrun af því að hún þótti svo handhæg. Enn er hún bara í kollinum á einhverjum. Það er lítið um efndir," segir Jón Steindór.

Eitthvað er um að fyrrverandi starfsmenn íslenskra verktakafyrirtækja hafi leitað eftir vinnu í útlöndum en Jón Steindór segir ekki hlaupið að slíku.

„Aðrir hafa orðið fyrir búsifjum þótt ekki sé það í líkingu við það sem hefur orðið hér. Danir tala um 25 prósenta samdrátt og eru í öngum sínum en ætli það séu ekki 25 prósent eftir hjá okkur."

- bþs