Sir Alex Ferguson: Ekki gleyma Arsenal í titilbaráttunni

Sir Alex Ferguson, stjóri Manchester United, segir það vera alltof snemmt að afskrifa lið Arsenal í baráttunni um enska meistaratitilinn. Margir töldu Arsenal missa af möguleika sínum þegar liðið tapaði leikjum sínum á móti United og Chelsea en skoski stjórinn er ekki á sama máli enda hefur Arsenal minnkað forskot Cherlsea og United á síðustu vikum.

„Arsenal er aftur komið inn í baráttuna," sagði Sir Alex Ferguson á heimasíðu Manchester United. „Þeir eiga eftir auðveldustu leikjadagskránna og þetta verður athyglisverður endasprettur," sagði Ferguson.

„Við verðum að halda einbeitingunni og reyna að sjá til þess að við gerum ekki mistök. Við töpuðum á móti Everton og vorum þá þreytulegir. Við komum vel til baka á móti West Ham og byggðum síðan á því í sigrinum á Aston Villa í úrslitaleik deildarbikarsins," segir Ferguson.

„Við höfum sýnt það og sannað mörgum sinnum að þetta félag hefur mikla staðfestu og leikmennirnir okkar gefast aldrei upp. Það er góður hæfileiki og við ætlum að sanna hann það sem eftir er tímabilsins," sagði Ferguson.