Undanþága þótt reglur séu brotnar

Heilbrigðiseftirlit Reykjavíkur hefur samþykkt að framlengja undanþágu til þess að hægt sé að nota Hegningarhúsið á Skólavörðustíg áfram til næstu áramóta.

„Fram kom að ekki hefur verið farið að skilyrðum hvað varðar fjölda fanga og að mikið álag hafi verið á húsnæðinu,“ segir í bréfi umhverfis- og samgöngusviðs Reykjavíkurborgar til Guðmundar Gíslasonar, forstöðumanns Hegningarhússins, eftir skoðun á húsnæðinu og samtöl við Pál Winkel fangelsismálastjóra og Guðmund sjálfan.

„Loftræsting er léleg í klefum og verður varla úr því bætt svo viðunandi sé en þær úrbætur sem gerðar voru með því að bora göt neðst á hurðir geta ekki talist fullnægjandi,“ er dæmi um lýsingu umhverfissviðsins á stöðu mála.

Í bréfi til umhverfisráðuneytisins vísar forstöðumaðurinn til þess að ekki hafi orðið úr byggingu nýs fangelsis í Reykjavík eins og til hafi staðið.

„Hins vegar er ljóst að það myndi valda verulegri röskun á starfsemi refsivörslukerfisins ef Hegningarhússins nyti ekki við fyrir móttöku og skammtímavistun fanga,“ segir forstöðumaðurinn og bendir síðan á að til standi að opna bráðabirgðafangelsi í Bitru sem töluvert muni létta álagið - gar