Terry yrði drepinn fyrir svona hegðun í mínu hverfi

Carlos Tevez segist eiga erfitt með að skilja hegðun John Terry í garð Wayne Bridge en eins og kunnugt er þá svaf Terry hjá barnsmóður Bridge. Tevez segir að Terry megi þakka fyrir að koma ekki úr sama hverfi og hann í Argentínu.

„Það er flókið að tjá sig um það sem Terry gerði Bridge. Ég er á því að maður geti ekki gert svona við eiginkonu annars leikmanns. Það er rangt og mér sýnist vanta talsvert upp á siðferðið hjá Terry. Þaðan sem ég kem þá komast menn ekki upp með svona hegðun. Þar missa menn lappirnar eða verra fyrir svona hegðun. Terry myndi ekki lifa það af að haga sér svona í mínu hverfi," sagði Tevez sem lenti í illdeilum við Terry í leik Chelsea og Man. City en þó ekki út af þessum málum.

Tevez segist einnig alltaf lenda í leiðindum með Michael Ballack.

„Ég hef alltaf lent í leiðindum með Ballack. Ég veit ekki af hverju? Kannski líkar honum illa við mig rétt eins og mér líkar illa við hann. Ég hef þess utan aldrei skilið hvað hann er að öskra á mig á vellinum. Hann skilur mig eflaust ekki heldur."