Skuldar ríkinu 26 milljarða

Viðskipti Fjármálaeftirlitið (FME) hefur tekið yfir rekstur VBS fjárfestingarbanka og skipað bankanum nýja stjórn til bráðabirgða að ósk stjórnar bankans.

„Fjárhagsleg staða bankans er þröng, og hefur verið lengi," segir Jón Þórisson, forstjóri VBS. Uppgjöri síðasta árs er ekki lokið, en Jón segir að eiginfjárhlutfall bankans sé yfir lögbundnu átta prósenta lágmarki.

Unnið hefur verið að endurskipulagningu bankans í nokkurn tíma. Jón segir að litið sé á yfirtöku FME sem áfanga í endurskipulagningunni, enda muni það auka trúverðugleika ferlisins.

Fyrir tæplega einu ári fékk VBS 26 milljarða króna lán hjá Seðlabanka Íslands til sjö ára. Með því láni endurfjármagnaði bankinn skuld sína vegna endurhverfra viðskipta við Seðlabankann. Þá tók VBS lán hjá Seðlabankanum og lánaði áfram til viðskiptabankanna, eftir að lokað hafði verið fyrir lán til bankanna.

Jón segir yfirtöku FME ekki hafa áhrif á það lán, öðruvísi en að hún tryggi frekar endurgreiðslur á láninu. Veð fyrir láninu séu í lánasafni VBS, reiðufé og fleiru.

„Bankinn var kominn í fjárhags- og rekstrarvanda," segir Gunnar Andersen, forstjóri FME. Hann segir bókfært eigið fé jákvætt, en greiðslustaðan sé erfið.

Heildarskuldir VBS eru í dag um 39 milljarðar króna, segir Gunnar. Tveir þriðju hlutar skuldarinnar eru 26 milljarða króna lán Seðlabankans og tekjur bankans ekki nægar til að standa undir skuldinni við Seðlabankann.

Bráðabirgðastjórnin fer með völd stjórnar og hluthafafundar, og getur því skipt um stjórnendur telji hún þörf á því. Stjórnin starfar í þrjá mánuði í mesta lagi, og ákveður hvort bankinn starfi áfram eftir endurskipulagningu, eða leiti nauðarsamninga. - bj