Blúsbræðurnir fá blessun kaþólikka

Kvikmyndin Blúsbræðurnir (Blues Brothers) hefur hlotið náð og blessun Vatíkansins fyrir traust og kristileg gildi samkvæmt opinberu dagblaði Vatíkansins. Þar með er kvikmyndin komin í hóp kristilegra meistaraverka eins og The Ten Commandments, Jesus of Nazareth, og jólahugvekjunnar, It's a Wonderful Life.

Það voru grínistarnir Dan Akroyd og John Belushi, sem nú er látinn, sem léku bræðurna Jake og Elwood Blues í myndinni. Þeir hafa lifað lífi glæpamanna þar til þeir finna út að kaþólska upptökuheimilið sem þeir ólust upp á er fjárþurfi. Upprunalega voru persónurnar mótaðar í hinum sívinsælu grínþáttum Saturday night Live.

Vatíkanið lítur hinsvegar framhjá öllum lögbrotum bræðranna í myndinni, sem nóg var af, og mælir með myndinni fyrir alla sanna kaþólikka. Þess má geta að myndin á þrjátíu ára afmæli í ár.