Telja ríkið útrýma samkeppni í lyfjum

Frumtök, samtök sautján lyfjafyrirtækja sem starfa á Íslandi, mótmæla því harðlega að Lyfjaverslun Íslands verði endur­vakin, eins og greint var frá í Fréttablaðinu í vikunni að stjórnvöld hefðu til skoðunar.

Í ályktun frá samtökunum segir að allar aðgerðir sem heilbrigðisyfirvöld hafi ráðist í undanfarin misseri hafi dregið úr og brotið niður samkeppni á markaðnum.

„Í gegnum breytta greiðsluþátttöku og þar sem bara ódýrustu lyfin eru niðurgreidd hefur samkeppni nánast verið útrýmt," segir í ályktuninni. Þetta er útskýrt með því að stefna heilbrigðisyfirvalda sé sú að beina neyslu lyfja úr frumlyfjum í samheitalyf, eða eftirlíkingar af skyldum lyfjum. Erlend fyrirtæki sjái því enga ástæðu til að taka þátt í rannsóknum á markaði sem sé andsnúinn nýrri lyfjum.

Þá segir í ályktuninni að sérstakt sé að umræða um að endur­reisa Lyfjaverslun ríkisins fari af stað við þessar aðstæður. „Heilbrigðisráðuneytið gjörbyltir greiðsluþátttökukerfinu svo hægt sé að leggja meiri áherslu á ódýrustu lyfin eins og samheitalyf og þetta er gert á kostnað nauðsynlegra frumlyfja. Ef svo kemur í ljós að samheitalyfin eru dýrari hér á landi en á Norðurlöndum er lausnin að stofna Lyfjaverslun ríkisins," segja samtökin.

„Endurvakning Lyfjaverslunar ríkisins yrði ekkert annað en aðgerð til að stemma stigu við ástandi sem komið hefur verið á, leynt og ljóst, af heilbrigðisyfirvöldum sjálfum."stigur@frettabladid.is