Ótækt að forsetinn sé í stælum við ríkisstjórnina

Það er stjórnskipulega ótæk og óverjandi staða í Icesavemálinu að þjóðhöfðinginn sé í stælum við ríkisstjórn sína og tali öðru máli en hún á erlendum vettvangi. Þetta segir Þorsteinn Pálsson í grein í Fréttablaðinu í morgun og á þar við frægt viðtal við Ólaf Ragnar Grímsson, forseta Íslands, sem birtist á BBC í vikunni.

Þorsteinn segir ennfremur að sú fullyrðing forseta í viðtalinu að fyrir liggi að Íslendingar ætli að standa við skuldbindingar sínar sé röng og ósönn. Hann segir Ólaf hafa sett málið í þann farveg að þjóðin eigi að ákveða hvort staðið verði við skuldbindingar samkvæmt samningi, eða þeim hafnað. Það séu einu úrræðin sem þjóðin hafi á atkvæðaseðli forsetans.

Hann segir framkomu forsetans varpa ljósi á nauðsyn þess að breyta stjórnarskránni.