Man. Utd kaupir framherja frá Mexíkó

Manchester United tilkynnti í dag að félagið hefði keypt 21 árs gamlan framherja, Javier Hernandez, frá Chivas de Guadalajara. Kaupverð var ekki gefið upp og strákurinn á eftir að fá atvinnuleyfi.

Þessi efnilegi strákur hefur skorað fjögur mörk í fjórum landsleikjum með Mexíkó og gæti verið á leið á HM með landsliðinu.

„Ég er í skýjunum með að hafa nælt í svona ungan og efnilegan framherja. Hann lofar mjög góðu og mun styrkja hópinn okkar. Við bíðum spenntir eftir að fá fyrsta Mexíkóann í okkar lið," sagði Sir Alex Ferguson, stjóri Man. Utd.

United greiddi ekki bara pening fyrir leikmanninn heldur var einnig samið um að félagið spili á heimavelli Chivas í sumar en félagið mun þá vígja nýjan 45 þúsund manna leikvang.