Joe Cole búinn að samþykkja fjögurra ára samning við Liverpool

Joe Cole hefur samið við Liverpool og mun spila með liðinu næstu fjögur árin. Cole var með lausan samning hjá Chelsea og hefur verið orðaður við mörg stórlið á síðustu vikum. Þetta var staðfest á BBC.

Cole mun fara í læknisskoðun á næstu 48 tímum og verður eftir það orðinn leikmaður Liverpool og sá fyrsti sem stjórinn Roy Hodgson fær til liðsins.

Joe Cole mun fá 90 þúsund pund í laun á viku eða 17 milljónir íslenskra króna ef marka má fréttir ensku miðlanna en hann valdi það að flytja frá London og missa af möguleikanum á því að spila í Meistaradeildinni á næsta tímabili.

Cole sér möguleika á að fá fast sæti í liði Liverpool en hann hefur verið inn og út úr Chelsea-liðinu undanfarin tímabil.

Joe Cole er 28 ára gamall og hefur spilað með Chelsea frá 2003 þegar hann kom þangað frá West Ham. Hann skoraði 2 mörk í 25 leikjum með Chelsea í ensku úrvalsdeildinni á síðasta tímabili og varð þá enskur meistari í þriðja sinn.