Saksóknari í deilu við dómarann

Hæstiréttur mun á næstunni eyða óvissu um það hvort eðlilegt sé að brot gegn lögreglumönnum séu rannsökuð af samstarfsmönnum þeirra hjá sama embætti. Hæstiréttur hefur kveðið upp fjóra misvísandi dóma um þetta atriði og fór ríkissaksóknari vegna þess fram á að fimm manna dómur myndi dæma í enn einu slíku máli til að fyrir liggi skýr afstaða réttarins í eitt skipti fyrir öll.

Héraðsdómur Suðurlands vísaði á fimmtudag frá máli sem höfðað hafði verið fyrir brot gegn valdstjórninni. Ástæðan var sú að dómurinn taldi að sýslumaðurinn á Selfossi hefði verið vanhæfur til að fara með rannsóknina vegna þess að lögreglukonan sem varð fyrir árásinni starfar í umdæmi hans og samstarfsmenn hennar rannsökuðu málið. Valtýr Sigurðsson ríkissaksóknari kærði þessa ákvörðun til Hæstaréttar. Hann hafði áður farið fram á að dómarinn myndi bíða með ákvörðun sína þar til fimm manna dómur Hæstaréttar hefði kveðið upp sinn dóm.

Ágreiningurinn um hvort rannsaka megi brot gegn lögreglumanni í því umdæmi þar sem hann starfar eða hvort rannsókn skuli fara fram í öðru umdæmi er sprottinn af fjórum misvísandi dómum Hæstaréttar, eins og Fréttablaðið hefur fjallað um. Tveimur málum af fjórum þar sem lögreglumenn rannsökuðu brot gegn samstarfsmanni sínum hefur Hæstiréttur nýlega vísað frá, en dæmt í hinum tveimur.

Við þingfestingu málsins sem vísað var frá á fimmtudaginn kom til ágreinings milli ríkissaksóknara og verjanda sakbornings. Verjandi vildi, á grundvelli frávísananna tveggja í Hæstarétti, vísa málinu frá. Ríkissaksóknari vildi, á grundvelli hinna tveggja dómanna, að málið hlyti efnislega meðferð í dóminum. Að öðrum kosti yrði því frestað.

Valtýr Sigurðsson ríkissaksóknari segist hafa kært frávísunina til Hæstaréttar til þess að fá héraðsdómarana til þess að taka málið fyrir efnislega og dæma í því. „Dómarinn neitaði að fresta því þar til Hæstiréttur hefur fellt sinn dóm í maí. Frestunin sem slík er ekki kæranleg, þannig að það þurfti að fara þá leið að gera kröfu um að úrskurðurinn yrði ómerktur og jafnframt að fimm dómarar sitji í Hæstarétti í þessu máli einnig,“ segir Valtýr. jss@frettabladid.is