Flóð kvartana frá foreldrum

Leikskólaráð Reykjavíkurborgar mun endurskoða ákvörðun sína um að afnema systkinaforgang á leikskólum borgarinnar. Er þetta gert að tillögu Oddnýjar Sturludóttur, borgarfulltrúa Samfylkingarinnar.

„Undanfarin ár höfum við borgarfulltrúar, sérstaklega fulltrúar í leikskólaráði, varla fengið fleiri kvartanir frá foreldrum um neitt einstakt mál en afnám systkinaforgangs. Nú hefur áfangasigur náðst í því máli því leikskólaráð hefur ákveðið að endurskoða þá ákvörðun,“ segir Oddný.

Systkinaforgangur var afnuminn árið 2008 með þeim rökum að jafnræðisreglan væri brotin, en systkinaforgangur þýðir að yngri börn eru tekin inn á undan eldri börnum, eigi þau systkini á leikskólanum.

Sviðsstjóra leikskólasviðs verður falið að leita álits borgarlögmanns á réttmæti systkinaforgangsins og í kjölfarið leggja fyrir ráðið tillögur um hvernig hægt sé að koma til móts við foreldra sem eiga fleiri en eitt barn á leikskólaaldri.

Oddný segir þetta vera mikið hagsmunamál fyrir foreldra. „Á það hefur verið bent að það er harla ósanngjarnt að foreldrar keyri með lítil börn á tvo mismunandi staði í borginni. Það er í senn mikið álag á börnin og fjölskyldulífið í heild, auk þess sem það er ekki umhverfisvænt.“ - shá