Balotelli: Ég er alltaf ánægður - líka þótt ég brosi ekki

Mario Balotelli skoraði þrennu fyrir Manchester City í 4-0 stórsigri á Aston Villa í gær en fyrr um daginn voru fjölmiðlar uppteknir af því að strákurinn væri að deyja úr heimþrá.

Balotelli hefur skorað 8 mörk í 11 leikjum fyrir City en hann er ekki mikið að fagna þessum mörkum sínum sem mörgum þykir undarlegt.

„Ég er alltaf áægður og líka þótt ég brosi ekki," sagði Mario Balotelli í viðtali á heimasíðu Manchester City þar sem hann var spurður út í það af hverju hann fagni ekki meira mörkum sínum.

„Framherji á að skora mörk. Það er vinnan mín og þess vegna brosi ég ekki. Ég er samt ánægður og ég get líka skorað fleiri mörk," sagði Balotelli.

Carlos Tevez var hvíldur í leiknum á móti Aston Villa en nú bíða menn spenntir eftir því hvað Roberto Mancini gerir í næsta leik sem verður á móti Blackpool á laugardaginn.

„Ég er mjög ánægður hjá Manchester City þótt að ítölsku blaðamennirnir séu að skrifa um það að ég vilji fara til AC Milan. Ég er hér og legg hart að mér á æfingum. Ég vil verða mikilvægur maður fyrir þetta félag og úrslitin ráðast nú alltaf inn á vellinum," sagði Balotelli.

„Við getum orðið enskir meistarar og ég er vissu um að við verðum enn sterkari á nýju ári," sagði Balotelli að lokum.